Saturday, April 17, 2021

இசூமியின் நறுமணம் - வாசிப்பு அனுபவம் - எழுத்தாளர் ராதா கிருஷ்ணன்

 

இசூமியின் நறுமணம் சிறுகதை நூலை தொகுத்து கொள்ள வசதியாக இரண்டாக பகுத்து கொள்கிறேன்.  முதலில் தமிழ் நிலத்தில் நிகழும் கதைகள். 


இந்த தொகுதியில் தமிழ் நிலத்தில் நிகழும் கதைகள் என 4 உள்ளன,  அதில் மூன்று பெரிய குடும்பங்களின் வீழ்ச்சிகளை, அதையொட்டிய மனநிலைகளை பேசும் கதைகள்.  இந்த காலகட்டத்தின் இக்கதைகளில் வரும் குடும்பங்களின் வரலாற்று ஆவணங்கள் என கூட இந்த சிறுகதைகள் சொல்லமுடியும், கூடவே இந்த நிலத்தில் இருந்த சமூகங்களில் நிகழ்ந்த  மாற்றங்களையும் சொல்லி செல்கிறது,  முதல் நோக்கில் இந்த விதத்திலேயே இந்த சிறுகதைகளை முக்கியத்துவம் அமைகிறது என்று நினைக்கிறேன். உதாரணமாக இந்த நான்கில் ஒன்றான "அறமென படுவது யாதென கேட்பின்" எனும் சிறுகதை, இதில் பெரிய குடும்பமாக இருந்து வீழும் குடும்பமாக பிள்ளை சமூகத்தை சேர்ந்த நவநீதம் பிள்ளை வருகிறார்,  சாதாரண நிலையில் இருந்து, அதாவது பிள்ளையிடம் வேலை செய்யும் தொழிலாளியாக இருந்து கடைசியில் பிள்ளையின் வீட்டையே ஜப்தி செய்யும் ஒருவராக சாமிநாத முனையரியராக (கள்ளர் சமூகம் ) வருகிறார்.  பிள்ளை எவ்வாறு வீழ்கிறார், முனையதிரியர் எவ்வாறு மேலே எழுகிறார் என்பதெல்லாம் இந்த சிறுகதை படுசுவாரஸ்யமாக சொல்லிச்செல்கிறது, அதன் வழியாக இந்த கதை மாந்தர்களின் குணநலன்களையும். இது ஆவணம் என்பதை தாண்டி ஸ்வாரஸ்யமான கதை என்பதை, தாண்டி, பாத்திரங்களின் குணங்களை அழகாக காட்டுவதை தாண்டி எவ்வகையில் இலக்கியமாகிறது என்றால் இந்த கதை மனித மனதில் கசடு புகுந்தால் உருவாக்கும் தாக்கங்களை சொல்கிறது என்பதால்தான்.  இந்த கதை தலைப்புதான் அதுவும்.  மேல் விளக்கத்திற்காக இந்த பாடலையும் அதன் அர்த்ததையும் காப்பி பேஸ்ட் செய்கிறேன். //அறமெனப் படுவது யாதெனக் கேட்பின் மறவா திதுகேள் மன்னுயிர்க் கெல்லாம் உண்டியும் உடையும் உறையுளும் அல்லது கண்டது இல்.’

பிறர்க்கென உதவும் பெருமனம் யாருக்கு வரும்? மனத்துக்கண் மாசில்லாதவனுக்கே வரும் என்க. மனத்துக் கண் மாசு புகுந்துவிட்டால் அங்குப் பொறாமைப்பேய் முதற்கண் குடிபுகும். ஆசையெனும் அரக்கன் வாழ்வான்; வெகுளி எனும் வேண்டாத பண்பு வீறிடும்; இன்னாச் சொல் இனியதோர் இடம்பெறும். என்வேதான் மனத்துக் கண் மாசற்றுத் துலங்கவேண்டும்; அஃதே அறம் என் கிறார் வள்ளுவர்.//

இதில் சாமியாத முனையதிரியர் மனதில் இருக்கும் மாசு அவரை எவ்வளவு பாவத்தின் சம்பளங்கள் வாங்கி கொண்டாலும் கடைசிவரை தூய்மை அடையாமல் தடுக்குகிறது,  கருணையோ,  நன்மையை செய்யும் மனமோ இல்லாமல் ஆக்கி விடுகிறது.  ஒரு  நல்ல இலக்கியம் எதை விட்டு விலகி இருக்க வேண்டும் என்பதை சொல்வதை அது நிகழ்த்தும் மாயத்தை காட்டி புரிய வைக்கும், இந்த கதை அதை நிகழ்த்துகிறது. 

இந்த சிறுகதை தொகுப்பில் இருக்கும் இன்னொரு உலகம் என்பது ஆண் பெண் உறவு, அது நிகழ்த்தும் மாயங்கள்,  இடர்கள்,  த்ரோகங்கள் முக்கியமாக கைவிடல்கள், அது உருவாக்கும் நிராதரவு நிலைகள்.  இதிலிருக்கும் பல கதைகள் இதை மையமாக கொண்டவைதான். இதை அடித்தளமாக கொண்டு வாழ்வில் நிகழும் நம்ப முடியாத புதிர்களையும்,  அது அளிக்கும் ஆச்சிர்யங்களையும் சொல்கின்றன.  உதாரணமாக செர்ரி பிளாசம் கதை,  அதில் வரும் நாயகிக்கு ஜப்பான் மீது கட்டற்ற பிரியம், ஈர்ப்பு இருக்கிறது,  அது ஒருவகையில் முன்குறிப்புணர்த்தலாக கதையில் வருகிறது, ஏனெனில் வாழ்வில் வெறும் மூன்றுநான்கு  நாள் மட்டுமே தங்கும் அங்கு தங்கும் அவள் தன் வாழ்வின் முக்கியமான ஒன்றை இழக்கிறாள், உண்மையில் இழப்பதற்காகவே அங்கு வருகிறாள் ! அந்நிலம் மீதான ஈர்ப்பெல்லாம் இதில் வந்து முடியவா என்பதை காணும் போது வாழ்வின் மர்மம் மீது மிகுந்த திகைப்பு உருகாகிறது. இந்த சிறுகதை இதை தாண்டியும் பல இழைகள் கொண்ட கதை,  குடி உருவாக்கும் சிக்கலை தீவிரமாக சொல்கிறது,  அதை விட குடும்ப உறவில் போன பிறகு தனது உடல்நலன் தன் குடும்பத்தையும் உள்ளடக்கியது எனும் பொறுப்பை தட்டிக்கழிக்கும் பொறுப்பின்மையின் விளைவுகளையும் பேசுகிறது,  இதை தாண்டி இந்த கதையில் இன்னொரு மனித மனம் எடுக்கும் வடிவம் பற்றிய குறிப்பு,  அவள் கணவன் இறந்த அந்த மூன்று நாட்கள் அழாதது.  இக்கதைக்கு சற்று இணையான சூழலை நான் நேரில் பார்த்திருக்கிறேன், என் நண்பன் தன் மனைவியுடன் கர்நாடகாவில் இருந்து ரயிலில் வரும் வழியில் உடல் கோளாறினால் இறந்தான்,  இறந்த கணவனை கொண்டு கோவை வந்திறங்கினாள் அவள் மனைவி,  நான் அவர்களை பார்த்தது பிறகு வீட்டில் நண்பன் அலங்கரிக்க பட்டு சடலமாக,  அருகில் அவள் அவனையே பார்த்தபடி அழாமல் இருந்து கொண்டிருந்தாள், அவள் அழாதது எனக்கு, அங்கிருந்தவர்களுக்கு பெரிய பதபதைப்பை அளித்தது, இந்த சிறுகதை இந்நிகழ்வை ஞாபக படுத்தியது,  மனம் ஏன் அப்படி ஒரு நிலை எடுத்து அழாமல் தடுக்க வைக்கிறது என்பதை யோசிக்கும் போது எனக்கு புதிராக இருக்கிறது. 

எனக்கு மிக பிடித்த இன்னொரு கதை "தானிவத்தாரி ".  ஒரு தவறு, அதனால் தன் வாழ்வு சூன்யமானதை சொல்லும் பெண், இன்னொரு இயற்கையின் உலகில் அந்த தவறை இனிமையான அனுபவமாக காண்கிறாள். இந்த சரிதவறை தாண்டியை சமன்தான் இந்த சிறுகதையை சிறந்த ஒன்றாக மாற்றுவதாக எண்ணுகிறேன். ஒவ்வொரு நாளும் புதிதாக இணையை தேடி கொள்ளும், அதற்காக கலைஞனாக மாறும் அந்த உகியிசு குருவி இந்த சிறுகதைக்கு இந்த சிறுகதையில் வரும் நாடோடியான சிமுராவிற்கு அழகான உவமானம் ! ஒரு நல்ல கதை ஒருவரின் பல மனநிலைகளை,  மனநிலை வேறுபாடுகளை முன்வைக்கும்,  இந்த கதையில் நாயகி துயரத்தை வெளிப்படுத்துகிறாள்,  இன்னொரு இடத்தில் அதை மறந்து ஒரு பெண்ணாக (பெண்மன விருப்பங்கள் ) சிமுராவை ரசிக்கவும் செய்கிறாள்.  ஒன்றிற்காக இன்னொன்றை இழக்க விரும்பாத மனம் ! ஒரு இடத்தை தன் அலைபாயும் மனதை வெறுக்கிறாள், இன்னொரு இடத்தில் ரசிக்கிறாள்.  கதையில் அலைபாயும் மனம் வார்த்தை வரும் இடம் கதையின் திருப்புமுனை இடம், இது கதையில் அழகாக காந்திருக்கிறது,  உள்ளே அழகாக ஜப்பானிய மொழி இதில் கலந்தும் கொள்கிறது. 

இந்த சிறுகதைகளில் நான் மேலே சொன்னவை தாண்டி இன்னும் நிறைய விஷயங்கள் உள்ளன, கிட்டத்தட்ட எல்லாமே நல்ல வாசிப்பனுபவத்தை அளிக்கும் கதைகள், நடு ஆணிகளாய் எஞ்சியவர்கள் கதை மிக முக்கியமானது,  இலக்கியமாகவும்,  பேசப்படாதவர்களின் வரலாறாகவும் இந்த கதை முக்கியமானது.  பாதிக்கபட்டவனின் வலியை சுமந்த மகனின் கதை இது,  உண்மையில் இங்கிருக்கும் ஒடுக்கபட்டவர், இவர் எல்லாம் ஒன்றுதான்,  இவர்கள் வளர்ந்த பிறகு தங்களை ஒடுக்கியர்களை எப்படி எதிர்கொள்கிறார்கள் என்பதை காண.. இந்த கதை நாயகரிடம் தன் தந்தையின் வலிமிகுந்த வாழ்வின் துயரம் அப்படியே உள்ளது,  ஆனால் அதை உருவாக்கியவனின் மீது வெறுப்பில்லை,  அவன் சந்ததியிடம் கூட தன் தந்தையின் ஞாபகம் வந்ததால்தான் தன்னை மீறிய தார்மீக கோபத்தை தன் அலுவலக செயல்பாடு வழியாக கெளிப்படுத்தினான், பிறகு அதையும் விட்டான். 

இதையெல்லாம் மீறி இம்மாதிரியான சிறுகதைகள் இதையொற்றிய  நம் அனுபங்களை திரும்ப நம்மிடம் கொண்டுவருவதும் வாசிப்பில் கிடைக்க கூடிய இன்னொரு விஷயம் என்று நினைக்கிறேன்.  உதாரணமாக மலரினும் மெல்லியது எனும் சிறுகதை,  இந்த கதை ல பெண் வெறுமையை கடக்க வேறு ஏதுமில்லை,  காமம் மட்டுமே இருக்கிறது என்பது கிட்டத்தட்ட ஒரு கண்டத்தால்தான்,  கோபிகிருஷ்ணனின் லாகிரி என ஒரு சிறுகதை உண்டு,  சற்றுநேரம் ஒரு ரேசன் கடையில் ஒரு திருமணமான பெண்ணும், திருமணமான கதை நாயகனும் மாறிமாறி பார்த்து ரசித்து கொள்வார்கள்,  கதை அந்த நேரத்து வெறுமையை கடக்கும் போதை அது என்று சொல்லும், இந்த கதை படிக்கும்போது முற்றிலும் வெறுமை கொண்ட இளமை வயதிலிருக்கும் பெண் காமம் எனும் போதையில் விழுவதை தவிர வேறு வாய்ப்புகளே இல்லை என்று எண்ண வைத்தது. சைமன் அதை தவறு என்று எண்ணாமல் தாண்டி தன்னை விடுவித்து கொண்டு நகரும் மனநிலை மேன்மையான மனிதர்களுக்குரியது !  ஆனால் அவன் மன்னித்தாலும், மறக்க வில்லை என்பது தெரியாவார்கள் துரோகம் இழைக்க மாட்டார்கள் என்ற வார்த்தைகளில் வெளிபடுகிறது, இவருக்கு நெருக்கமானவர்கள் மனைவியும், மனைவியுடன் தகாத உறவு வைத்துக்கொண்ட அவனது அண்ணனும்தான்.  நான் இதுபோல வெளிநாடு போய் குடும்பம் சிதைந்த சிலரை சந்தித்து இருக்கிறேன்,  அதில் ஒருவர் மறக்க முடியாதவர்,  ஒரு மகன் உண்டு, இவர் இல்லாததால் உள்ளே நுழைந்த ஒருவனும், இவர் மனைவியும் சேர்ந்து மகனை மிக கொடுமை படுத்தி உள்ளனர்.  பிறகு இவர் வந்து, அவனை வெளியேற்றி எல்லா பஞ்சாயத்தும் முடிந்து அந்த பெண் தவறை உணர்ந்து இவரும் மன்னித்து சேரும்போது மகனால் அதை ஏற்க இயலவில்லை,  மகனுக்காக அவர் மனைவியை விட்டுவிட்டு ஆனால் அவர் நினைவாக ஏங்கி கொண்டிருந்தார் என்னிடம் பேசும் போது !


சரி குறை சொல்லாமல் முடித்தால் விமர்சனம் என்பது ஒரு சார்பாக அமைந்து விடும் என்பதால்,  இந்த கதையில் சைமன் சாமிக்கு கிடா வெட்டுவதாக வருகிறது,  ஒரு கிரிஸ்துவர் கிடா வெட்ட மாட்டார் என்று நினைக்கிறேன், எனவே கதை ஆசிரியர், அடுத்த பதிப்பில் சைமனை, அவர் மனைவியை, மகளை தாய்மதம் திருப்பும் படி "ஆடிட்டர்" பார்வையில் நின்று கேட்டு கொள்கிறேன்:)

Sunday, March 7, 2021

இசூமியின் நறுமணம் - சிறுகதை தொகுப்பு - விமர்சனம் - கனலி விக்னேஷ்வரன்

ரா.செந்தில் குமார் எழுதிய 'இசூமியின் நறுமணம்' என்கிற சிறுகதையைத் தொகுப்பை மூன்று தினங்களுக்கு முன்பு வாசித்து முடித்தேன்.

வாசித்தவுடன் எப்போதும் கொஞ்சம் மனதில் தேக்கி வைத்துத் தயங்கித் தயங்கி தான் கொஞ்சமாக எழுதவே தோன்றுகிறது.
இதிலிருக்கும் பன்னிரெண்டு சிறுகதைகளில் நான்கு சிறுகதைகள் கனலியின் இணையதளத்தில் வெளிவந்தவை. அதிலும் 'இசூமியின் நறுமணம்' என்கிற சிறுகதை வெளிவந்து பரவலாக அனைவரின் கவனத்தையும் பெற்றது. இதிலிருக்கும் இன்னொரு சிறுகதையும் கனலி தளத்தில் வந்திருக்க வேண்டும் ஆனால் அதில் சில மாற்றுக் கருத்துகள் எனக்கும் செந்திலுக்கும் வந்ததால் அந்த சிறுகதை மட்டும் வெறு ஒரு இணையதளத்தில் வெளிவந்தது.
கனலியில் வெளியான சிறுகதைகள் மற்ற இணையதளத்தில் வெளியான சிறுகதைகள் அனைத்தையும் நான் ஏற்கனவே இணையத்தில் வாசித்திருந்தாலும் மீண்டும் ஒரு முறை தொகுப்பாகப் புத்தகத்தில் வாசிக்கும் போது இதிலிருக்கும் சிறுகதைகள் இன்னும் வாசிப்பிற்கு மனதிற்கு நெருக்கமாக அமைகிறது.
தொகுப்பில் இருக்கும் பன்னிரண்டு சிறுகதைகளும் நேர்கோட்டுச் சிறுகதைகள் தான்.சிறுகதைகளின் வகைமைகளில் செந்தில் வாசகர்களுக்கு எந்தவித நெருக்கடியும் தரவில்லை. சிறுகதைகளில் பெரிய பெரிய வார்த்தை சொல்லாடல்களும் இல்லை. ஒரு தேர்ந்த ஓவியனுக்கு ஒரு ஓவியத்தை வரையத் தொடங்கும் போது ஒருவிதமான நிதானம் இருக்கும். இன்னும் கொஞ்சம் ஓவியம் அவனுக்குக் கைகூடி வரும்போது அவனுக்கும் ஓவியத்திற்கும் ஒரு நேர்த்தி கிடைக்கும். கடைசிக் கட்டத்தில் ஓவியம் முடிவுற்ற வேலையில் ஒன்று ஓவியனுக்கு தன் மனதில் ஏற்கனவே வரைந்து ஓவியத்தை அதிலும் வரைந்திருப்பான் அல்லது அதன் வடிவம் முற்றிலும் மாறிய ஒன்று அங்கே நிகழ்ந்திருக்கும். செந்திலுக்கு இப்படித்தான் நிகழ்ந்திருக்கும் என்று தோன்றுகிறது. பன்னிரண்டு சிறுகதைகளை மறுவாசிப்பு செய்யும் போது நிச்சயம் சில சிறுகதைகள் மீது அவருக்கே மாற்றுக் கருத்துகள் வரலாம் என்று தோன்றுகிறது. ஆனால் இதில் ஒன்றும் தவறில்லை என்றே நினைக்கிறேன். தொகுப்பிலிருக்கும் அனைத்து சிறுகதைகளும் சிறப்பாக அமைய வேண்டும் என்கிற நிர்ப்பந்தம் எந்தவொரு தொகுப்புக்கும் தேவையில்லை என்றே நினைக்கிறேன்.சில நேரங்களில் அத்தகைய சரியாக வராத சிறுகதைகள் தான் ஒரு எழுத்தாளர்களின் வெற்றியும். ஒருவேளையில் அடுத்த முறை அவற்றைப் பற்றி அவர்கள் அவர்களுக்குள்ளேயே ஒரு விமர்சனத்தை எழுப்பி இன்னும் முற்றிலும் புதிய ஒரு படைப்பின் வடிவத்திற்கும் அதன் அழகியல் வடிவத்திற்கும் அவர்கள் பயணம் போகலாம்.
தொகுப்பில் எனக்குப் பிடித்த சிறுகதைகள் எனில் இவற்றையெல்லாம் சொல்வேன்.
இசூமியின் நறுமணம்
தானிவத்தாரி
மடத்து வீடு
செர்ரி ஃப்ளாசம்
மலரினும் மெல்லியதாக
நடு ஆணிகளாய் எஞ்சியவர்கள்.
இந்தச் சிறுகதைகளை நான் தொகுப்பில் முன்னே கொண்டு வைப்பதற்குக் காரணங்கள் மிகவும் எளியது அவைகள் இவற்றின் நீளம், கதைகளின் கரு, கடைசியாகச் சிறுகதைகளின் இலக்கணமாக இங்கே அடிக்கடி பேசப்படும் ஒரு திருப்பத்தை வாசகனுக்குத் தருவது. இரண்டாவது இந்த அனைத்து சிறுகதைகளிலும் ஒருவிதமான தத்துவார்த்த உரையாடல்களைச் செந்தில் முயற்சி செய்து பார்த்திருக்கிறார். இத்தகைய முயற்சிதான் இந்த அத்தனை சிறுகதைகளுக்கும் ஒரு அழகியலைத் தருகிறது. மூன்றாவது செந்திலின் அனைத்து சிறுகதைகளிலும் தவறாமல் உறவுச் சிக்கல்கள் வந்தாலும். இந்தச் சிறுகதைகளில் வரும் உறவுச் சிக்கல்களும் அவற்றைச் சிறுகதைகளில் எதோ ஒரு கணத்தில் சேர்ந்து அல்லது விலக்கி காட்டுகிறார். இந்தச் சேர்ப்பு அல்லது விலகல் தான் செந்திலின் பலமும் கூட என்று நினைக்கிறேன். அவருக்கு மெல்லிய மூடிச்சுகளை போடவும் தெரிகிறது அவற்றைச் சரியாக தொந்தரவு இல்லாமல் கதாபாத்திரங்களுக்கு நெருடல் இல்லாமல் அவிழ்க்கவும் தெரிந்திருக்கிறது. நிற்க! இங்கேயும் செந்திலுக்கு ஒரு வேண்டுகோள் வாசகனுக்கு எல்லா நேரங்களிலும் நெருடல் இல்லாமல் முடிச்சுகளை அவிழ்க்க பிடிப்பதில்லை உண்மையில் அந்த முடிச்சுகளை இன்னும் இறுகப் போடவதை கூட வாசகன் சில நேரங்களில் விரும்புகிறான்.
இன்னொருபுறம் செந்தில் தொடர்ந்து ஜப்பானியச் சிறுகதைகளை எழுதுவதால் அவரை ஜப்பானியச் சிறுகதைகள் அதிகம் எழுதுபவர் என்கிற சின்ன விமர்சனம் இருக்கிறது. ஜப்பானிய இலக்கியத்துத்தை தீவிரமாகப் படிக்கும் சிலருக்குத் தெரிந்திருக்கும் அவர்களின் வடிவத்திற்கும் செந்தில் எழுதும் ஜப்பானியச் சிறுகதைகளுக்கும் வடிவத்திற்கும் நிறைய வித்தியாசங்கள் உள்ளன என்று. செந்தில் ஜப்பானிய நிலத்தை எடுத்துக் கொள்கிறார். அங்கிருக்கும் மனிதர்களின் பெயர்களை எடுத்துக் கொள்கிறார் தவிர அவரின் அத்தனை கதைகளின் பாடு பொருள் என்பது மறைந்திருக்கும் ஒரு தமிழ் நிலம் அதன் மனிதர்களும் என்றே நான் நினைக்கிறேன்.
ஒரு எழுத்தாளன் எல்லாவற்றையும் உன்னிப்பாகப் பார்க்க நேரிட்டால் போதும் அதுவே அவரின் சிறுகதைகளை இன்னும் சிறப்பாக எழுதித் தந்துவிடும் என்று தோன்றுகிறது. செந்திலுக்கு எல்லாவற்றையும் உன்னிப்பாகப் பார்க்கும் கலை கைவந்துள்ளது. அதனால் தான் அவரின் அத்தனை சிறுகதைகளில் வரும் மனிதர்கள், அவர்களின் உறவுகள், அவர்களின் உடல் சார்ந்த நெருக்கடிகள், நவீன வாழ்வின் அகம் சார்ந்த நெருக்கடிகள்,சுற்றுப்புறச் சூழலும், கீழ்மைக்கும் மேன்மைக்கும் மாறும் கணங்களும் இப்படி எல்லாவற்றையும் தன் வாழ்வில் செந்தில் நன்கு கூர்ந்து கவனமாகப் பார்த்துள்ளார் அல்லது ரசித்துள்ளார். அந்தக் கவனம் எனக்குப் பிடித்த மேலே உள்ள சிறுகதைகளில் மட்டுமல்ல அனைத்து சிறுகதைகளிலும் அவருக்குச் சரியாக உதவியுள்ளது.
கடைசியாகச் செந்தில் தரிசனம் கிடைக்கும் மேன்மை கதைகளிலிருந்து சற்றே கீழ்மைக்கும் போகும் கதைகளை இன்னும் நிறைய எழுத வேண்டும் என்று மட்டும் கேட்டுக் கொள்கிறேன். சிறுகதைகளின் வடிவம் சார்ந்த சில சிறுகதைகள் கூட அவர் முயற்சி செய்யலாம். கொஞ்சம் தான் இருக்கும் இலக்கிய பள்ளியின் கவனக்குவிப்பில் இருந்து வெளியே வந்து. (பள்ளியிலிருந்து அல்ல)

Wednesday, February 10, 2021

இசூமியின் நறுமணம் - சிறுகதை தொகுப்பு - வாசிப்பு அனுபவம் - எழுத்தாளர் திருசெந்தாழை

 

சுயவிருப்பங்களுக்கும்,குற்றவுணர்ச்சிக்கும் நடுவே இருக்கின்ற கோடு மிகமிக மெல்லியது.நமது விருப்பத்தின் மீதான அறமதிப்பீடுகளை நாம் பிறரிடமே எதிர்பார்க்கிறோம். நிறைவேறிய விருப்பங்கள் மிக லேசானவை.ஞாபகத்தில் அவை மேகமென தவழ்கின்றன.அதனை எப்போதும் தன்னுடன் இறுக்கக் கட்டிக்கொள்ள விழைகின்ற மனிதமனம் குற்றவுணர்ச்சி எனும் சரடையும் எப்போதும் எடுத்துக்கொள்கிறது.

" எனக்கொன்றும் அவ்வளவு வயதாகவில்லை
ஆனாலும் குற்றவுணர்ச்சி எனும் ஊன்றுகோல் இல்லாமல் என்னால் நடமாடமுடிவதில்லை" எனும் வி.என்.சூர்யாவின் வரிகளிலிருக்கும் உண்மையானது சமகால மனங்களிலிருந்து பெறப்பட்ட ஒன்று.
குற்றவுணர்ச்சி எனும் ஜாடியில் இட்டுவைக்கப்படுகின்ற ஞாபகங்களில் துருப்பிடிப்பதேயில்லை. நினைவுகளிலிருக்கும் உயிர்ச்சத்துமிக்க பகுதியாகவும் குற்றவுணர்வே இருக்கிறது.
" இஷுமியின் நறுமணம்" தொகுப்பிலிருக்கும்,தானிவத்தாரி சிறுகதை சமீபகால சிறுகதைகளுல் முக்கியமானது மட்டுமல்ல அந்த தொகுப்பிலேயே தனித்துவமானதும் கூட
தனது கடந்தகால வாழ்வைக் கூறுகிறாள் ஒருத்தி.குடும்ப அமைப்பிற்கு வெளியே அவள் மேற்கொண்ட அந்த உறவு வெறும் பத்து நாட்களே நீடிக்கிறது.அவள் தனது குடும்பத்திற்கு திரும்பும்போது அவளது கணவன் அவளைப் புறக்கணித்துச் செல்கிறான்.தனது குழந்தையோடும்,வயதான தாயோடும் வாழ்கின்ற அவள் தனது வாழ்வை நொறுக்கிய அந்த பத்து நாட்களை முற்றிலும் ஞாபகத்திலிருந்து அழிக்க விரும்புகிறாள்.

பேசிக்கொண்டே நடந்து வருகின்ற அவள் தூரத்தில் ஒரு பறவையின் குரலைக் கேட்கிறாள்.தன்னை மறந்து புன்னகைத்தபடி, " சிமுரா பாடுவதற்குமுன் இப்படித்தான் ஒருமுறை தொண்டையை கணைத்துக் கொள்வான்.அது அவ்வளவு வசீகரமாக இருக்கும்" என்கிறாள்.
குற்றம் என எண்ணுகின்ற ஒரு செயல் ஞாபகத்தில் எப்படி இவ்வளவு துல்லியமான அடுக்குகளாக பதிந்திருக்கிறது. நாம் குற்றத்தின் இதழ்களை எப்போதும் வருடுபவர்களாக இருக்கிறோம்.குற்றம் என்பது நவீன அறங்களில் சிக்கலான வடிவம் கொண்ட ஒன்று.
" இருளைப் போல வெளிச்சத்திற்கு மீட்சி தருவது வேறில்லை" என்கின்ற போகனின் வரியில் அறமும் குற்றமும் தங்களை ஓருடலாகவே பிணைந்துகொள்கின்றன.
குற்றங்களை ஒப்புக்கொள்கிறவனுக்கும்,எழுத்தாளனுக்கும் பெரிய வேறுபாடில்லை.
படைப்பில் தன்னை அப்படியே முன்வைக்கின்ற படைப்பாளிகளை மதிப்பிடவே நாம் அஞ்சுகிறோம்.ஜி.நாகராஜனில் துவங்கி திருடன் மணியம்பிள்ளை வரை எப்போதும் வசீகரமான ஒரு தலைமுறையே இதில் நிறைந்துள்ளது.
ஏனெனில், கலை மட்டுமே குற்றங்களை ஒப்புக்கொள்கிறவனை கௌரவித்து விடுதலை செய்கிறது.
கலைவழியே முன்வைக்கப்படும் குற்றங்களிலிருந்து வழிகின்ற கண்ணீரைப்போல தூயது வேறில்லை.

எழுத்தாளர் திருசெந்தாழை

Friday, February 5, 2021

இசூமியின் நறுமணம் - விமர்சனம் - எழுத்தாளர் ப.தெய்வீகன்

 1986 இல் ஐரோப்பிய தமிழ் எழுத்தாளர் ஒன்றியத்தினால் கொண்டுவரப்பட்ட புலம்பெயர் எழுத்தாளர்களது முதலாவது சிறுகதைத்தொகுதியான "மண்ணை தேடும் மனங்கள்" நூல் முதற்கொண்டு கடந்த 35 வருடங்களில் எத்தனையோ சிறுகதைப்பிரதிகள் புலம்பெயர்ந்துள்ள எழுத்தாளர்களிடமிருந்து வெளிவந்துவிட்டன. இந்த புலம்பெயர் சிறுதைகளில் பெரும்பாலானவை சுற்றி சுற்றி ஒரேவட்டத்துக்குள் ஓடிக்கொண்டிருந்தாலும், அவற்றுக்கு இன்றும் ஒரு கவனிப்பு இருந்துகொண்டுதானிருக்கிறது. தங்களது எளிமையான - வழமையான - போராட்டம் நிறைந்த வாழ்வினை இலக்கியம் எவ்வாறு நுட்பமாக அவதானிக்கிறது என்று புலம்பெயர்ந்துள்ளவர்களும், இன்னமும் ஆச்சரியங்களை பொழிந்துகொண்டிருக்கும் வெளிநாட்டு வானத்தின் கீழ் புதிய கதைகள் ஊற்றெடுத்துக்கொண்டுதானிருக்கும் என்ற எதிர்பார்ப்புடன் தாயகத்தில் உள்ளவர்களும், புலம்பெயர் கதைகளின் மீது தங்கள் அதீதமான கவனத்தை குவித்துவைத்திருக்கிறார்கள்.

இவ்வாறான கவனத் திரட்சியின் முன்னிலையில் வைத்துப்பார்க்கக்கூடிய ஒரு சிறுகதைத்தொகுதியாக செந்தில்குமாரின் "இசூமியின் நறுமணம்" அண்மையில் படிக்கக்கிடைத்தது. போர்நெடியில்லாத புலம்பெயர் பிரதியொன்றை படிக்கும்போது அந்த உணர்வே வித்தியாசமானதாக இருந்தது.
செந்திலின் இந்த முதலாவது சிறுகதைத்தொகுதியிலுள்ள பன்னிரு சிறுகதைகளில், பத்துக்கதைகள் ஜப்பானிய நிலத்தில் நிகழ்பவை. தொழில் நிமிர்த்தம் ஜப்பானில் பல ஆண்டுகளாக வசித்தவருகின்ற செந்தில் எழுதியுள்ள இந்த சிறுகதைகள் அனைத்தும், ஜப்பானிய மண்ணை தமக்குள் ஈர்த்துக்கொள்வதற்கு தாகத்தோடு அங்கலாய்த்தபடியுள்ளன. ஆனால், அவை ஜப்பானிய கதை மாந்தர்களை, அந்த தேசத்தின் சுவாத்தியத்தை, கலாச்சாரத்தை இன்னபிற விடயங்களை அனைத்தையும் மிகவும் மெல்லிதாகத்தான் உள்ளீர்த்துக்கொண்டு, அந்த ஈரத்தினை வாசகனோடு பகிர்ந்துகொள்கின்றன. ஆழமான அவதானிப்புக்களைக்கொண்டவை என்று கூறிவிடமுடியாது.
தொகுப்பிலுள்ள பல கதைகளிலும், எல்லோருக்கும் பொதுவான வாழ்வின் தருணங்களை சமரசங்கள் நிறைந்த சாதாரண பாத்திரங்கள் வழியாக செந்தில் எழுதிச்செல்கிறார். அநேக ஜப்பானிய கதைகளிலுள்ள கதாபாத்திரங்களின் பெயர்களையும் ஊர்ப்பெயர்களையும் களைந்துவிட்டுப்பார்த்தால், அவை தமிழக சூழலில் நடைபெறக்கூடிய சாதாரணமானவைதான். ஆனால், செந்திலுக்குள் இருக்கக்கூடிய கதைசொல்லி, எல்லாக்கதைகளையும் கலையாத கனவுகளின் வழியாக வாசகனை அழைத்துச்செல்வதற்கு முடிந்தவரை முயற்சிசெய்திருக்கிறது.
தொகுதியின் கடைசிக்கதையான "நடு ஆணியாய் எஞ்சியவர்கள்" ஜப்பானிய நிலத்துக்குரிய இலட்சணங்களோடு இலக்கியத்துக்கு நெருக்கமாகிவிடுகிறது. "இசூமியின் நறுமணம்" போன்ற எத்தனையோ கதைகள் சமகாலத்தில் வெளிவந்துவிட்டபோதும், செந்திலின் கதைமொழி அந்தக்கதையை முழுமையாக உணரவைக்கிறது. ஜப்பான் நாடு தற்கொலைகளுக்கு பெயர்போன தேசம். ரயிலுக்கு முன்னால் வீழ்ந்து தங்களை மாய்த்துக்கொள்வது என்பது, அந்நாட்டில் சதா இடம்பெறுகின்ற சடங்குபோலாகிவிட்ட ஒன்று. இந்தப்பிரச்சினையை ஆழமாகச் சென்று பேசியிருக்கவேண்டிய "அன்பும் அறனும் உடைத்தாயின்" - என்ற சிறுகதை, பறக்க எழும்பிய வேகத்திலேயே வீழ்ந்துவிடுகிறது. ஏனைய கதைகளில் பெரும்பாலானவை உணர்த்தப்படுபவையாக அன்றி, சொல்லப்படுபவையாக நகர்கின்றன.
செந்திலிடமுள்ள நுட்பமான அவதானிப்புக்கள் - கதைக்களத்துக்குரிய கச்சாப்பொருட்கள் அனைத்தும் - இந்தத்தொகுதியிலுள்ள பல கதைகளில் துண்டு துண்டாக ஆங்காங்கே நின்று கண்சிமிட்டுகின்றனவே தவிர, அவற்றுக்குரிய வெளிச்சம் போதவில்லையோ என்று உணரவைக்கின்றது. அந்தவகையில் பார்க்கும்போது, ஒரு முதல் தொகுப்புக்குரிய செல்லமான குறும்புத்தனங்களோடுதான் இசூமியின் நறுமணத்தை படிக்கவேண்டியுள்ளது.
மேலோட்டமாக சொல்லிச்செல்கின்ற கதைகளின் ஆழத்துக்கு இறங்குவதும், கதைகளின் முடிவினை கதைகளே முடிவுசெய்வதற்கு அனுமதியளிப்பதும் கைகூடினால், செந்திலின் கதைகளுக்கு புதிய பரிணாமம் கிடைக்கும். கூடவே, புலம்பெயர் தேசத்திலிருந்து தமிழ் இலக்கியத்திற்கு புதியதொரு கதைசொல்லியும் கிடைப்பான்.
வாழ்த்துக்கள்
செந்தில்!

Tuesday, February 2, 2021

இசூமியின் நறுமணம் - சிறுகதை தொகுப்பு - விமர்சனம் - சரவணன் மாணிக்கவாசகம்

 இசூமியின் நறுமணம் & பிற கதைகள்- ரா.செந்தில்குமார்:

ஆசிரியர் குறிப்பு:
தஞ்சை மாவட்டம், மன்னார்குடியைப் பூர்வீகமாகக் கொண்டவர். கணிப்பொறியியல் முதுநிலைப் பட்டத்தைப் பெற்றவர். தற்போது டோக்கியோவில் வசிக்கும் இவர் பல இலக்கியநிகழ்வுகளை ஜப்பானில் முன்னெடுத்துள்ளார். இவரது முதல் சிறுகதைத்தொகுப்பு இது.
மலரினும் மெல்லிது-
தெரியாத மனுசன் என்ன பெரிய தீமையை செய்ய முடியும்ணே என்று முதலில் சொல்வதற்கும் கடைசியில் சொல்வதற்கும் எவ்வளவு வித்தியாசம்! செருப்பில்லாதவன் காலே இல்லாதவனைப் பார்த்துத் தேறுதல் கொண்ட கதை. இரண்டு கதைகள் இதில், இரண்டையும் துரோகம் எனும் சங்கிலி இணைக்கிறது.
தானிவத்தாரி-
தானிவத்தாரி என்றால் ஜப்பானிய மொழியில் இருண்ட பள்ளத்தாக்கைக் கடக்கத் துணையாக வரும் பாடல். வாழ்க்கையும் சிலநேரம் இருண்ட பள்ளத்தாக்கைக் கடப்பது போல் ஆகிறது. Momentary weakness வாழ்வைத் தடம்புரட்டுகிறது. அதெல்லாம் தாண்டிய நுட்பம் கஷுமி சிமுராவின் நாட்டுப்புறப்பாடலைக் கடைசியில் நினைவுகூர்வது.
செர்ரி ஃப்ளாசம்-
உணர்வைத் தூண்டும் கதை. பொதுவாக அளவுக்கு அதிகமாகக் குடிப்பவர்கள் வீட்டுக்கு கடைசியாகத்தான் அந்த விவரம் தெரியும். எது கனவோ சிலருக்கு அதுவே சாபமாகிறது. ஆரம்பத்தில் இருந்தே எந்தத் தகவலும் அனாவசியமாக இல்லாமல் வார்த்தை சிக்கனத்தோடு நேர்த்தியாக சொல்லப்பட்ட கதை. ஜப்பானிய டிவி பெண் பற்றிய வர்ணனை வாசகர் மனத்தில் இவர் ஏற்படுத்த விரும்பும் தாக்கத்தை சரியாக விளைவிக்கிறது.
அனுபவ பாத்தியம்:
நிலம், ஓட்டல் தொழில், மளிகைக்கடை போல சில வியாபாரங்களில் முதலாளி தினம் உட்கார்ந்தே ஆக வேண்டும். ராமசாமி, ராஜகோபால் கோணத்தில் சொல்லப்படாமல் அருண் கோணத்தில் கதை நகர்வதால் அதிக அழுத்தம்.
இசூமியின் நறுமணம் -
தாமரைத்தண்டு வறுவல் நிறையப் பேர் சாப்பிட்டிராதது. மிகவும் சுவையானது. குடிப்பவர்களின் பேச்சு பெரும்பாலான நேரங்களில் Sex talkஆக மாறும். டோக்கியோவில் இருக்கும் Culture தான் இப்போது இங்கிருக்கும் Corporateகளில். காலையில் கடுமையான முகமா இரவில் இப்படி எனத் தோன்றும். குடியும் கலவி குறித்த பேச்சுகளுமாக நீளும் கதை, கடைசிப் பத்தியில் ஒரு Quantum jump செய்து கதையின் கோணத்தையே மாற்றுகிறது. மிக நன்றாக வந்திருக்கும் கதை.
அன்பும், அறனும் உடைத்தாயின்-
கதைசொல்லி கதையின் முதலில் சொல்லும் ஒரு தகவலுக்கும், கதையின் முடிவிற்கும் நெருங்கிய சம்பந்தம் இருக்கிறது. என்ன இருந்தாலும் சிவா பிரியாவிடம் ஒரு வார்த்தை கேட்டிருக்கலாம் இல்லையா? அநாவசியமாக ஒரு வார்த்தை கூட இல்லாத நல்ல கதை.
கனவுகளில் தொடர்பவள்-
இசூமியின் தேடல் தான் கதை. எதையும் திட்டமிடாது வருவதை அந்நேரத்தில் எதிர்கொள்வது. எல்லாமே அவள் வாழ்க்கையில் அப்படித்தான் நடக்கிறது. மணம், மணமுறிவு, கதைசொல்லியுடனான கலவியும் கூட அப்படித்தான். ஆனால் அந்த மெயில் மட்டும் தெளிவாகத் திட்டம் தீட்டிய மெயில்.
அறமெனப்படுவது யாதெனக் கேட்பின்-
கெட்டகுடியே கெடும் என்பது தான் கதையின் மையக்கருத்து. சும்மா இருந்த சங்கை ஊதிக்கெடுத்தானாம் ஆண்டி என்பது போல் ஆனது.
மயக்குறு மக்கள்:
அதிர வைக்கும் கதை. அம்மாவிற்கு நிச்சயம் அந்தப்பொருட்கள் குறித்துத் தெரிந்திருக்க வாய்ப்பில்லை. கதையில் மேலதிகத் தகவல்கள் போல் சொல்லப்படும் விசயங்கள் கதை முடிகையில் வேறு பரிமாணம் கொள்கிறது.
மடத்துவீடு:
கன்னத்தில் அறைவது போன்ற மற்றொரு கதை. பெண்கள் அதீத பொறுப்பில் குடும்ப நிர்வாகம் செய்யும் இடங்களில் ஆண்கள் அலட்டாமல் இருப்பது வாடிக்கை. ஆனால் சீனிவாச ராவ்.........Playboyஆக முயற்சிக்கும் ராஷேஸ் கூட அந்த வீட்டுக்கு இனிபோகமாட்டான் என்றே தோன்றுகிறது.
சிபுயா கிராஸிங்க்-
ஜப்பானில் நடக்கும் கதை. வாழ்க்கையில் தோல்வி அடைந்த இருவர், அல்லது சராசரி வாழ்வை வாழ விரும்பாத இருவரின் கதை. சுனாமி, அணுஉலை வெடிப்பு எல்லாம் உண்மை. இரண்டு பகுதிகளில் தனித்தனியாக கதாபாத்திரங்கள் பற்றிய Picture, மூன்றாவது பகுதியில் கதை என்ற யுத்தி நன்றாக இருக்கிறது.
நடு ஆணிகளாய் எஞ்சியவர்கள் மீண்டும் ஜப்பானைக் கதைக்களமாக வைத்து எழுதியது. Weaker moment எப்போதாவது தான் வரும். ஜப்பானிய கலாச்சாரமும் இந்தியக் கலாச்சாரமும் சந்திக்கும் மற்றுமொரு கதை.நன்றாக வந்திருக்கும் கதை.
பன்னிரண்டு சிறுகதைகள் கொண்ட தொகுப்பு. மூன்றில் இரண்டு பங்குக் கதைகள் ஜப்பானைக் கதைக்களமாகக் கொண்டவை. இது போன்ற கதைகளே நவீன தமிழ் இலக்கியத்தின் எல்லைகளை விரிவு படுத்தும். Cross culture கதைகள் என்பது வேறு நாட்டில் வேறு கலாச்சாரத்தில் வாழ்ந்தவர்கள் இந்தியப் பார்வையுடன் பார்க்கும் கதைகள். ஜப்பானியக் கதைகளில் நாம் இதைப் பார்க்க முடியாது. பலகாலம் வேறுநாட்டில் வாழ்ந்தவர்கள், வேரை இங்கே விட்டுச் சென்றவர்கள் இது போன்ற கதைகளைத் தொடர்ந்து எழுதித் தமிழ்இலக்கியத்திற்குப் புதுரத்தம் பாய்ச்ச வேண்டும்.
செந்தில் குமாருக்கு சிறுகதை வடிவமும், வித்தியாசமான கதைக்கருக்களும் கைகூடி வந்திருக்கிறது. இசூமியின் நறுமணம் ஒரு NRI மட்டுமே எழுதக்கூடிய Perfect சிறுகதை. முழுக்க உள்ளூரை வைத்து எழுதிய மயக்குறு மக்களும் நல்லதொரு கதை.
இவர் தவிர்க்க வேண்டியது அறமெனப் படுவது... போன்ற சாதாரண கதைகளை. தி.ஜாவின் கங்கா ஸ்நானம் கதையிலிருந்து எத்தனையோ கதைகள் ஏமாற்றியவர் நன்றாக வாழ்வது பற்றி. அதே போல் பன்னிரண்டு கதைகள் கொண்ட தொகுப்பிலேயே வாழ்ந்து கெட்ட குடும்பங்கள் அடிக்கடி வருகின்றன.
இவை மிகச்சிறு குறைகள். தொகுப்பு வருமுன்னரே இவர் நல்ல சிறுகதை ஆசிரியர் என்பது எல்லோருக்கும் தெரிந்ததே. இணையத்தில் பார்த்த ரிசல்டை மீண்டும் பள்ளியில் சென்று பார்ப்பது போன்ற உறுதிபடுத்துதலே இந்தத் தொகுப்பு.